Kampioni i botës në Formula 1 nga viti 2008, Lewis Hamilton, është
shprehur i kënaqur pas konfirmimit se legjenda e garës më prestigjioze
automobilistike, Michael Schumacher, do rikthehet të pilotojë.
“Është
kënaqësi ta kemi Michaelin sërish në Formula 1. Ai është një legjendë,
një njeri i mirë, dhe jam i lumtur për të që do ta ketë sërish
mundësinë të bëjë punën më të mirë në botë- të garojë në Formula 1”.
“Jam mësuar ta shikoj Michaelin duke garuar kur isha në kategoritë e të
rinjve dhe gjithmonë shpresoja që të jem në Formula 1 derisa ai është
ende aty”, ka thënë Hamilton për Press Association. Hamilton bëri garën
e tij të parë në F1 në vitin 2007, një vit pasi Schumacher u pensionua
dhe ishte i zhgënjyer që nuk e pati rastin ta testonte veten me
shtatë-herë kampionin.